Ihieng oh Kaselehlie maingko. Iet rongen rahnwet nan legislature

Sapwelimatail sahi sang Pohnpei State Legislature patohwen patehngehr tohn sahi teikan sang nan Pacific wet ong nan wie lamalam lap kapahisek-riau en APIL, de ong irail Pwihn en Kou-Kosonned en nan kahn deke kapatapat en nan Pacific wet kuloak duwau ni menseng nan Hisbiscus Room nan Crowne Plaza nan wein Saipan. Patohdien rahnwet wiawihkihda irail me moange sahi kan oh emen Board of director. Me patohdi nan pali keieu ni menseng wet iei Speaker, The Honorable Marvin T. Yamaguchi me patohwen tapwih sahi sang wein Pohnpei oh Board of Director, Honorable Dionisio Saimon. Nan kasarawi mwotomwot en ritidahn wie lamalam kapahisek-riau wet, Kepina en wein Saipan patohwen koasoamwohier koaros me patehng doadoahk wet ong nan wehi kaselel wet. Sapwelimatail Speaker, The Honorable Yamaguchi patohiengehr nan eh tungoal sakarda nan pali keieu en tiepenehn rahnwet. Pwehn sansal, oaralap en kapokon wet iei, “Economic Development, Strengthen Local Economies, Health, and Welfare throughout the Blue Continent.” De me kak wehwehki, “Kakehlaka roson mwahu, keirda oh epwel mwahu en wasahn kousoan iei kepweipen keirdahn pai en wehi.”

Nan pali keriau en tiepene wet kin audaudiki kasalada de presentation kan sang ehuehu pali kan. Rahnwet sahi sang Pohnpei patohwen paiamwahu oh patehng presentation pahieu. Doadoahk en rahnwet imwisek ni kuloak 4:52 mwurin souwas.

Ah meteht audepen rahnwet. Kalangan oh Kaselehlie